olivia-auf-reisen

2te Tag a de Ibera Sümpf

2010-09-29T00:04:00.002+02:00

De hütig tag hemer wieder mit emene super frühstück gstartet. den simer übere in Affebrüellwald gfahre. i dem Waldstuck lebet 8 Affe und mir hend sogar richtig glück gha, will mers aktiv atroffe hend. normalerwiis schlafet die am morge und tanket sunne, so dass den am namittag chönd umespringe. es paar sind aber scho wach gsi und voll in aktion, vorallem de jung Aff het d muetter schön uf trab ghalte.

Nach dere chline wanderig simer wieder zrugg und uf üs het - oh wunder - wieder en 3-gänger gwartet. das mal hemer es lauwarms chürbismousse zur vorspies kriagt, es stuck fleisch (für d olivia es rohs!!!!!!!!) und härdöpfelgratin (für die andere fisch und härdöpfelgratin) und zum dessert no es stuck flan mit dulce de leche!!

den isch wieder siesta-time gsi! is bikini gschlüpft und ab an pool und es mittagsschlöfli gmacht. am 4i simer den uf die zweit bootssafari gange. hend eigentlcih wieder s gliche gseh wie bi de erste, abr d stimmig uf em wasser isch eifach herrlich gsi. jez simer wieder e chli am usspanne und so richtig am d ferie gnüsse.....mmm zum z nacht hemer scho ghört, dass es lasagne git!! :)

föteli chömet au wieder spöter :)

Ibera Sümpfe

2010-09-28T00:06:00.005+02:00

am Samstig abig hemer üsi längsti reis in agriff gno. zerst simer 24 stund lang vo mendoza uf corrientes gfahre. in corrientes hemer müesse umstiege und die nächste 3 stund im bus uf Mercedes verbringe. in Mercedes simer den vom Acuna abgholt worde und er het üs die nächste 2.5 stund über e holper-stolper strass bis zu üsem ziel bracht. üses ziel isch d irupe-lodge in ibera ganz nöch a de grenze zu paraguay gsi. d ibera sümpf beaspruchet öbe en viertel vo de ganze provinz corrientes. und das isch natürlich s paradies für wassertier.

am abig spat simer endlich acho und uf üs het sogar no en 3-gänger gwartet: zerst es warmi rüeblichüechli, den 2 super feini fleischspiessli mit komischem essig-dunktem gmües und zum dessert en fruchtsalat. tod müed und pappsatt simer den endlich ines richtigs bett gheit!

de hütig tag het scho früh agfange. am 9.30 sind üsi beide rössli gsattlet parat gstande. das heisst, vorher no dusche (endlich nach 30stunde busfahrt - juhuuu) und natürlich en super feine z morge gnosse. den simer 2.5 stunde hoch zu ross durch das dörfli gritte, hend vieli schöni vögeli und super schöni landschaft gseh. und sogar en aff hemer no z gsicht kriagt.

Wieder zrugg uf de Lodge het scho wieder en 3-gänger uf üs gwartet: rohschinke, griesstürtli mit chässosse zur vorspiess, härdöpfelstock (bäääää) und zwei riiise schnitzel als hauptgang und zum dessert (es träumli) vomene tiramisu. uf das abe simer grad direkt is bikini gschlüpft und an pool abe go s verdauigsschlöfli mache. zum glück isch es da wieder soooo heiss, es chent doch no öbis werde mit üsere brüüni :)

am halbi 4ii isch es den uf d bootsafari gange. üsi tourguidin d sabrina isch e schwiizerin vo vor 1.5 jahre uf argentinie usgwanderet isch. mer hend vili chlini und grossi kaimane, wasserschwein, vögeli und spinne mit spinnenetz wie drahtseil gseh.

hüt am abig wartet es (sicher wieder seeehr feins) "Asado" uf üs. das isch wie es bbq, abr natürlich mit argentinischem Fleisch...... :)

meh föteli chömet spöter.....s internet isch da usse i de pampa sooooooo langsam, da hani kei nerve!:)

Mendoza

2010-09-25T03:20:00.005+02:00

Nachere 16-stündige busfahrt simer in mendoza acho. mendoza liit e chli wiiter obe im norde und es isch wieder herrlich schön warm! Typisch für mendoza isch, dass es da guet 1000 Wiigüeter het und somit 70% vo allne wii us argentinie in mendoza hergstellt werdet. Das isch für us natürlich Alass gnueg gsi, zum uf e wii-tour zgha. zerst simer s Wiiguet "Granata" gange. das isch en chline familiebetrieb und alles no sehr altmodisch. dete hemer die erste zwei Rotwii chöne teste...mmmmmm segemer da nume!!

s zweite wiiguet isch "visitadores" gsi. Das wiederum isch s totale gegeteil zum erste. Das Wiiguet isch nonig so alt, die beste vo de beste maschine und alles total modern und neu. Dete hemer wiederum zwei sehr gueti wii dörfe teste! Leider isch momentan kei ernte-ziit und somit hemer nöd gseh, wie das de Wii hergstellt wird.

am schluss simer no es oliveöl-guet go aluege. Au da isch es so gsi, das kei ziit für olive isch und so hemer nur die leeri fabrikationshalle mit de maschine gse. abr mir hend am schluss no es paar brötli mit verschiedene oliveöl dörfe probiere.....das het grad sehr guet da nach em wii!! :)

Bariloche

2010-09-24T18:47:00.007+02:00

Vom warme Puerto Madryn simer über Stock und Stei, Berg duruf und Berg durab 16 Stunde im Bus is Skigebiet Bariloche gfahre. E traumlandschaft het üs det erwartet. Bariloche liet direkt amene gletschersee mit klarblauem Wasser. Rund ume raget schneebedeckti berge in Himmel. Vo üsem hostel hemer en super usblick uf de See gha, abr au ufs Städli, dass direkt in Hang inebaue worde isch.

Da mir üs nöd so als Wandervögel erwiise hend und Skifahre den doch e chli z kalt gsi wär, hemers recht schnell gseh in bariloche. ein Tag im Dörfli und am andere Tag hemer no en chline usflug an See gmacht. sind sogar öbe 1 Stund i de natur umegloffe!! :)

Allem i allem, es wunderschöns dörfli, mir hend üs wie i de skiferie gfühlt i de schwiiz gfühlt!

Peninsula Valdes, Puerto Madryn

2010-09-22T23:49:00.006+02:00

A üsem letzte Tag in puerto madryn simer uf d halbinsle peninsula valdes gange. d tour het grad mit em hightlight agfange...mer sind mit em schiff use uf de "neue Golf" und i dere bucht tummlet sich d wale mit ihrne babys. mer hend s ganze programm gseh....wies d schwanzflosse zeiget hend, gumpet sind, gspielt hend und die ganz muetige sind sogar direkt vor em boot uftaucht. das mal sinds tatsächlich no nöcher gsi als vom strand us..... eifach wieder es wahnsinns erlebnis gsi!

am namittag simer den no e see-elefante-kolonie go aluege. abr dur das, dass mer die nur vo wiit weg gseh hend, sind die natürlich nöd so spektakulär gsi. den simer au no zunere pinguine-kolonie gfahre...isch halt für üs eifach wieder e mal en pingu gsi!

am abig simer den mit em bus wiiters in richtig bariloche gfahre.......

Puerto Madryn

2010-09-21T02:35:00.006+02:00

Uf em Program vom hütige Tag isch RELAXE gstande. Zerst hemer mal wieder richtig usgschlafe, den gmüetlich z mörgelet und geg de mittag simer den go d stadt aluege. s städli isch ganz herzig mit vielne lädeli, emene herrliche strand und total gmüetlich.

s grosse highlight vom hütige tag isch abr definitiv am abig cho: mer sind an naheliegende strand gfahre und vo dete het mer chöne Wal beobacht. die sind öbe 20 meter vor üs uftaucht, hend sich umedreht und gspielt. herrlich gsi zum zueluege und total faszinierend, will so nööch hemer no nie en wal gseh!

de abig hemer den mit packe und im hostel verbracht. morn gömer doch wieder früh uf e tour und hoffet, dass mer no meh wale z gseh kriaget!

Punta Tombo, Puerto Madryn

2010-09-20T03:01:00.006+02:00

Hüt am morge früh simer uf üsi ersti Tour in Puerto Madryn gange. Mir sind uf Punta Tombo gfahre, dass isch öbe 2.5 stunde vo Puerto Madryn entfernt. Dete het üs die grössti Magellan-Pinguine-Kolonie usserhalb vo de Antarktis erwartet. Mer hend chöne beobachte, wie s eifach ganz fuul im Nästli lieget, dur d gägend watschlet oder direkt us em Meer agschwemmt worde sind. Dur das, die Pinguine überall lieget hemer zimli nöd a sie here chöne, abr mer hend doch müesse ufpasse, nöd dass plötzlich zue gschnappet hend!

Nach em Mittag ässe im Auto simer wieder zrugg uf Rawson gfahre. Das liit schlussendlich öbe i de mitti vo de ganze strecki. dete simer ufs Boot umgstiege und sind is meer usgefahre uf d suechi nach Commerson-Delfin. Das sind öbe 1.5 Meter schwarz-wiisi Exemplar. Mer hend sehr glück gha, scho nach churzer ziit sinds um s boot umegumpet und hend mit de wälle gspielt. es herrlichs spiel gsi zum zueluege!

Nach em Bootstrip simer wieder richtig Puerto Madryn gfahre. Am Abig simer den e chli in Puerto Madryn umespatziert....vills üs da so guet gfallt, leget mer morn zerst no en relax-dia iii und hoffet, dass mer Wale vo de Küste us gse chönd.....

Mar del Plata

2010-09-19T02:41:00.007+02:00

am dunnstig morge früh simer mit dem bus in richtig Mar del Plata gfahre. Das isch eine vo de Badeort schlechthinn im Summer. natürlich simer wieder e mal absolut nöd i de saison dete gsi....somit hemer natürli zerst mal es GROSSES problem gha zum es hotel z finde. die erste beide hostel sind sogar gschlosse gsi....! defür hemer den ines super guets hotel iicheckt, inklusive blick uf s meer! :)

am erste morge simer zerst ines muschelmuseum gange....d fisch det drinne hend üs abr meh interessiert! ;) mit de ziit isch es halt eifach chli langwilig worde, muschle a muschle z gseh!

wiiters simer den is Aquarium vo Mar del Plata gange. das isch en freiziitpark mit vielne tieratraktione.....im Summer!! so isch es natürli klar gsi, dass es paar atraktione gar nöd git. üs het de park abr trotzdem sehr guet gfalle!

den hemer wieder e mal müesse ziit totschlah! üsi wiiterfahrt isch erst am abig am 10ni gsii richtig Viedma. So simer no es bizli im Zentrum umeglatsch, hend es restaurant gsuecht vo mer esse chan (hend leider keis gfunde, en fastfood-stand isch es den schlussendlich worde) und hend ordentlich gfrooore!

Üses Fazit: Mar del Plata isch es schöns städli.....im SUMMER!

jaja buenos aires het zwei flughäfe.....

2010-09-16T01:35:00.003+02:00

Am Samstig, am 11. september isch d sändy in buenos aires glandet. da ihre flug über sao paulo gange isch, isch das für mich klar gsi, dass sie am internationale flughafe achunt. beziite bini richtig flughafe gange, vo doch 40 minute vom stadtzentrum entfernt isch. und det hani gwartet und gwartet und gwartet und es isch eifach kei sändy cho...... per telefon awiisige am andere geh, vo mer stönd, vo mer sind, was rund ume isch. hin und her gloffe i dem flughafe, abr nix!!

gmerkt, dass mer a zwei verschiedene flughäfe sind, hemer den öbe nach ere stund!! :)

naja, bin den zum andere flughafe gfahre und han die gepäcklosi sändy dete abgholt!! :) ihres gepäck isch in sao paulo stecke bliibe und eigentlich hets no am gliche tag sölle nahgliefert werde. abr ebe....eigentlich! am suntig abig isch den au ihres gepäck in buenos aires acho und mir hend am mentig wiiters uf montevideo, uruguay chöne ga.

leider isch den am mntig es unwetter gsi in buenos aires und uruguay. das het zur folg gha, das mer gschlagni 5 stund hend müesse warte, bis üsi fähre den het endlich chöne losfahre. in uruguay acho simer zerst mal pflotsch-nass uf hotelsuechi gange. leider keis eifachs unterfange gsi, da grad irgend en informatik-kongress gsi isch und all hotel usbuecht gsi sind. schlussendlich hemer den abr doch no es bettli gfunde für üs!! ;)

am zistig hemer den e chlini stadttour dur montevideo gmacht und natürlich bini nomal id schuel gange. am abig isch es den is pony pisador gange........ :)

hüt am mittwoch simer wieder zrugg uf buenos aires gange mit de fähre. eignetlich hemer grad wiiters welle gha, abr üsi mäge hend das nöd zue lah. so simer nomal e nacht in buenos aires und morn morge gats in richtig MAR DEL PLATA.....

Rosario

2010-09-10T01:29:00.005+02:00

Gester bini witers uf Rosario gange. Das isch nur grad 5 stunde vo buenos aires entfernt. Es isch immer no e riiisigi stadt, abr doch scho beachtlich chliner als buenos aires.

in rosario isch d flagge vo argentinie entworfe worde und da druf sinds natürlich bsunders stolz. sie hend da defür es grosses denkmal errichte und das bini go aluege. au de che guevara isch da gebore. sis geburtshuus hani abr - wen wunderets? - nöd gfunde! ;)

morn gangi wieder zrugg uf buenos aires und am samstig morge landet d Sändy :)

Buenos Aires

2010-09-06T02:23:00.006+02:00

Nachdem ich d Michi und de Oli uf de Flughafe vo Asuncion bracht han, het für mich wieder s lange warte agfange. han erst geg de abig die wiiteri busfahrt richtig bueno aires gha. han de tag gnützt und bin no chli go shoppe gange :)

am abig hani mi den uf de weg nach Buenos Aires gmacht...18 stunde im bus. d busfahrt het richtig super agfange, en superbequeme bus, grossi sitz wo mer sogar het chöne umwandle ines bett, es wilkomens-cüpli, z nacht, en dessert und sogar en whisky isch spendiert worde! defür hemer um so meh pech gha a de grenze. mir sind richtig usenand gno worde. das heisst, jede hets gepäck müesse öffne. zum glück sind s a mim gepäck nöd all zu interessiert gsi....het vilicht da dra gläge, dass die dreckig, stinkendi wösch z öberst gläge isch ;)
janu, usreisestempfel vo paraguay, iireisestempfel vo argentinie und wiiter isch d fahrt gange. leider simer scho nach öbe 500 meter wieder gstoppt worde vo de polizei und sie hend au no de bus gnauers unter d lupe gno. sie hend sogar unter de sitz glüüchtet, ob sich dete au no öbis befindet. und ein passagier het wieder müesse s ganze gepäck uspacke....kei ahnig warum. nach öbe wieder e halb stund isch den d fahrt wiiter gange. die restlich fahrt isch defür ohni grossi unterbruch über d bühne gange!

in buenos aires acho, hani mi en mit de marrie troffe. das isch e schüelerin vo ich i de schuel in uruguay kenne glernt han. de plan wär gsi, dass mer zeme s weekend in buenos aires verbringet und sie den hei gat und ich wiiters in norde. abr klar, es chunt alles anders: Am Samstig simer vo zwei so chline idiote samt pistole überfalle worde...ich han echt glück gha und han mini sache irgendwie chöne verteidige.kei ahnig, wieso udn woher mir de muet gha hend zum üs so z wehre, abr wenigstens hend mir 1 täsche chöne rette! d marrie het leider nöd so viel glück gha und ihre isch alles gstohle worde...inklusive pass! isch saublöd, in argentinie langet e kopie vom pass nöd, zum öbis z chaufe mit de kreditcharte. so müemer immer s orginal mitschleppe!! super.....guet ab uf d polizei e azeig gmacht, den ufs konsulat zum erfahre, dass das erst am zistig wieder uftuet! so hockt jez d marrie eignentlich in buenos aires fest ohni pass, ohni geld, mit nix! ich bliibe natürlich da mit ihre und am zistig gats ab uf s konsulat zum en pass etc. z mache.

unterdesse probieremer d ziit in buenos aires z gnüsse. isch scho chli speziell und es komischs mulmigs gfühl bliibt, wenn mir uf d strass gönd. abr mir lönd üs nöd unterkriege...am sunntig simer anen super schöne Märt gange und hend defür um so meh geld usgeh! ;) den simer no zum hafe abe und hend d atmosphäre gnosse....hend abr au würkli hammer wetter gha!

am mentig und gester hemer no viiili anderi stadtteil vo buenos aires gseh. nichts desto troz isch es e super schöni stadt, tolli shoppingmöglichkeite und isch isch immer was los.

Encarnacion

2010-09-02T02:37:00.005+02:00

Nachdem mir endlich wieder verwachet sind, simer richtig Trinidad gfahre. In Trinidad hets Jesuite-Ruine wo zum Weltkulturerb ghöret. die meiste ruine sind no recht guet erhalte gsi. sogar uf de ussichts-turm hemer no ufe chöne.

de namittag hemer den in encarnacion verbracht...mer sind vo markt zu markt ghezt, leider hets nur seich geh zum chaufe! :(

Iguazu-Wasserfäll Puerto Iguazu

2010-09-01T01:43:00.006+02:00

A üsem letzte Tag in Puerto Iguazu hemer natürlich no die argentinischi Siite mit de Wasserfäll bsuecht. Iipfercht im iguazu-züügli simer richtig "gargante del diabolo" gfahre. Das isch de gröösst und imposantischt wasserfall vo allne. e riiisige völkerwanderig isch de kilometerlang steg übers wasser marschiert. die vorne acho isch d sicht eifach atemberaubend gsi. mit riisigem lärm isch das wasser über d klippe abe is tobel gstürtzt.

Da de Park sooo risig isch, hemer üs entschiede, es stückli vom weg mit emene gummiböötli z mache. uf em weg simer amene krokodilmami mit ihrem junge verbii cho. de isch soo nöch here gfahre, dass mers no fast hetten streichle chöne. :)
leider (vorallem zum nateil vo mir und de michi) hets natürlich suuuuper viel müggli uf em fluss gha. üsi wädli und füess gsend also tragisch us...und es bissst wie verruckt!!

am namittag siimer den natürlich no wiiter im park umegloffe. uf em weg hemer viiili nasebäre atroffe, abr zum glück hends mi das mal nüme verfolgt! ;) au e schlange isch üs über de weg chroche...nur leider de jaguar het sich nöd blicke lah!! ;)
und natürlich xx hundert wasserfäll....

mir sind no uf d isla san martin usegfahre, die isch so zege i de mitti vom rio iguazu grad unterhalb vom grösste wasserfall. da ich abr z fuul gsi bin, zum no meh laufe, hani s mir bequem am sandstrand gmacht. d michi und de oli sind tapfer wiiter marschiert...de oli het nach 5 minute ufgeh und isch wieder retour cho. d michi isch ganz uf d insle ufegstiige und isch au super belohnt worde defür. uf de insle obe hend sich viel geier versammlet und sie het richtig nöch a die here chöne.

langsam hemer üs den uf de "heiweg" gmacht. und zwar seeeehr langsam. mir hend erst z nacht am 1 die wiiteri busfahrt nach Posada gha. Guet, nomal go s städtli aluege, gmüetlich go z nacht esse und doch isch leider erst öbe 8ti gsi! üses gepäck hemer im hostel chöne deponiere und mir hend au no de ufenthaltsruum chöne nutze. den isch s grooosse warte wiitergangge.......!

defür pünkltlich am 1 simer mit em bus richtig posada losgfahre. D fahrt het öbe 5 stunde duuret...leider hemer wieder e mal nöd so en bequeme bus verdwüütscht. und zu allem elend isch es soooooo chalt det ine gsi, will die d klimaalag uf hochtoure laufe lah hend, dass a schlafe gar nöd z denke gsi isch.
am 5i am morge (mer hend dur d ziitverschiebig wieder 1 stund gunne) simer den in posada acho. da hemer zerst mal de bus müesse sueche, wo üs wieder zrugg uf paraguay, encarnacion bringt.

de bus het üs den schliesslich übr d grenze bracht...er het sogar gwartet, bis mir de usreisestempel gha hend. wieder in bus iigstiege, simer zu de iireisestell in encarnacion gfahre. da het den leider de bus nüme uf üs gwartet und mir sind wie bstellt und nöd abholt a de grenze gstande. gott sei dank, isch nur öbe 15minute spöter de nächst bus cho und de het üs den wieder mitgno.

in encarnacion acho, hemer grad ines luxushotel iicheckt!! :)

Adventure-Tour in Puerto Iguazu (Argentinien)

2010-09-01T01:05:00.006+02:00

Üse zweiti tag in puerto iguazu het ganz früh agfange. bereits am viertel vor 8ni siemr abholt worde für in jungle. Nachere öbe 30minütige holper fahrt simer z mitts im jungle gstande und üses erste Abentüür isch bevor gstande. 22 meter abseile! mit scho chli weiche chnüü hemer das ganze aber guet überläbt und es het sehr viel spass gmacht.

den isch en wahnsiiiiinnns marsch bevor gstande...sage und schreibe 1 kilometer hemer müesse wandere und de tourguide het so ta, als wärs e tageswanderig! schlussendlich simer abr den scho nach öbe 600meter am ziel gsi :) leider hemer keis tier gseh.

de letzt teil isch den no canoping gsi. höch i de gipfel simer vo baum zu baum grast. au das isch super lustig gsi, nur leider viel z schnell verbii...zumindestens für mich und de oli. d michi isch heilfroh gsi, vo sie wieder feste bode unter de fuess gha het! :)

Am namiitag simer zu de ussichtsplattform tres fronteras gloffe. vo dete us hemer en super schöne blick uf paraguay und brasilie gha.

Foz do Iguazu, Brasilie

2010-08-28T23:40:00.008+02:00

am Dunnstig namittag hemer den de bus vo Filadelfia wieder zrugg uf Asuncion gno. das mal hemer en bessere bus verdwütsch....puh glück gha! nach unglaubliche 5.30 stunde bequeme direkte busfahrt simer scho am ziel gsi!
da mir so schnell wie möglich wieder weg hend welle vo asuncion hemer grad no i de gliche nacht (uf de fritig) de nächst bus uf Foz do Iguazu in Brasilie gno. und das isch no de besser bus gsi....dur das mer erst am 12 i de nacht abgfahre sind, hemer sogar semi-cama gha. das heisst, mer hend so es halbs bett gha!! :)

endlich a de grenze zu brasilie acho, den de schock für mich!! gem. de brasilianische behörde bini sit em 2008 (mim letzte ufenthalt in brasilie) nüme usgreist!! zerst simer gar nöd drus cho, will mer muess ja nöd meine, dass die zollbeamte spanisch oder englisch redet! nei nur portugisisch! nach langem hin und her, hani den erfahre, dass i e buess muess zahle, will mer angeblich en stempel fehlt! und wenni die buess nöd zahle, chumi nüme us brasilie....bin also versuecht gsi, zum da bliibe!! ;)

am gliche tag simer no zu de iguazu-wasserfäll uf de brasilianische siite gange. die sind wieder traumhaft schön gsi. natürlich het en bsuech im vogelpark nöd dörfe fehle. mir hend wieder super schöni exemplar gseh und es isch recht unterhaltsam gsi mit de michi, vo ja angst het vor vögel!! :) sie isch zwar tapfer i die grosse voliere ine cho, abr vo den en vorluute tucan ihre fast zwüschet bei gfloge isch, isch es ihre z viel worde!! d papageie het sie den nur no vo usse bestuunt!! :)

z nacht hemer den inere pizzeria gässe! die hend uf die pizza jez aber alles gleit, vo s gfunde hend....vo salami, mozzerella über banana bis zu schoggi isch aber alles verträte gsi!

Hüt (samstig) hemer den de versuech gwagt, mini buess zum zahle! und wer jez glaubt, dass isch e sach vo 10 minute gsi, de tüüscht sich gewaltig! die erst hürde isch gsi: find e bank vo offe het! hahaha alli banke hend zue gah, die hend da so chliini lädeli vo jez eifach niemert denke duet, dass mer da rechnige chan zahle. guet, nach dem mer das gfund hend, isch d hürde 2 cho: mer chan nöd mit kreditkarte rechnige zahle!! nomal hahahah....han us de ohre grüüüchet, so gnervt bini unterdesse gsi!! guet, hürde 3: find en bankomat, vo üs geld git! nix, üsi charte hend die sch.... automate eifach nöd akzeptiert. s letzte wo mer hend chöne mache, isch üsi dollares und euro zeme chratz und die den umtuusche lah in rasilianisches geld. guet, retour zum rechnig zahle und mich arme tropf freichaufe!!! nach dem ganze, hani fluchtartig brasilie verlah!! :)

jez simer in puerto iguazu, s argentinische pendant zu foz do iguazu! hend es super hostel gfunde und hüt nacht machemer da mit em hostel es bbq! puerto iguazu isch es super herzigs döörfli und mir bliibet da grad 3 täg. morn machemer e adventure-tour dur de jungle und übermorn natürlich no die argentinischi siite vo de wasserfäll!

Tag 2 in Filadelfia

2010-08-26T00:55:00.006+02:00

Hüt simer grad nomal in Filadelfia bliibe, wills üs da so guet gfallt. und mer hend no chli meh über die Menonnite welle erfahre. Darum hemer grad nomal e tour mit em norbert epp gmacht.

zerst het er üs es indianer-dorf zeiget. scho faszinierend wie die lebet...! mer hend sogar mitemene indianer chöne rede! Das dorf isch eignetlich vo de menonnite gründet worde und de indianer zur verfüegig gstellt worde. das heisst, ganz am afang sind vorallem menonnite tatchräftig gsi, hüt zu tag sind eigentlich nur no zur Unterstüzig dete. d menonnite zeiget de indianer, wie mer d fälder bewirtschaftet, schuel git und suscht alles wissenswerte! so sind d indianer doch selbständig und verdienet sis eignige geld. und d menonnite hend de vorteil, dass d indianer meh oder weniger so lebet, wie si das gern hend und es biz kultivierter sind. au hend viel menonnite indianer als hilfsarbeiter, will d menonnite scho lang nüme arbeite uf em feld machet. zudem sind d grundstück extrem gross da und hüüfig wiit weg vom wohnhuus und dadurch sind d menonnite froh, wenn e indianerfamilie uf sim grundstück lebt und dete d arbeite verrichtet, natürlich alles unter ufsicht vom menonnit.

den simer richtig fortin boqueron gfahre. Das isch es chriegsfeld vo d entscheidigsschlacht im chacokrieg 1932 - 1935 zwüschet paraguay und bolivie stattgfunde het.

nachdem simer i die 3 Menonnite-kolonie Neuland gfahre. Somit hemer alli 3 Menonnite-kolonie im Chaco-gebiet bsuecht.

Morn hemer den no en halbe tag zum Filadelfia gnauer azluege. s git da no es paar museum über menonnite vo üs interessieret und no es grosses shoppingzenter vo menonnite. am namittag gats den wieder zrugg richtig asuncion und den direkt wiiter s richtig Iguazu-Wasserfäll.........

Filadelfia

2010-08-25T02:15:00.008+02:00

nachere wiitere Horrorfahrt vo Concepcion hets gheisse: herzlich willkome in Filadelfia. das chamer sogar wortwörttlich neh, will in Filadelfia isch d hauptsprach Düütsch. So verstaht sogar d michi und de oli s lebe da... :)

im bus sind gfühlti 40 grad (wahrschiindlich au in würklichkeit nöd wiit weg devo) gsi und so simmer gottefroh gsi, vo mer nach 7 stunde endlich am ziel a cho sind. mer sind grad uf em direkte weg richtig pool gstüüret....nur doof, dass mer sogar fuessabdrück im pool hinterlah het, will so viel sand und dreck drine gha het! die erste zwei vo natürlich kapituliert hend, bin ich und d michi gsi! :) d duschi het den schlussendlich abr au sin zweck erfüllt....

Filadelfia isch e menonnite-kolonie. das heisst, die lüüt sind vor 80 jahr us düütschland vertriibe worde und über Russland, China und Kanada uf Paraguay cho. Das isch au de hauptgrund, warums Plattdüütsch da die sprach isch. das heisst, so ziemlich alles isch uf düütsch und spanisch agschriibe. Au sehr viel Iiheimischi da chönd düütsch.

hüt hemer e düütschsprachigî tour in chaco gmacht. mer sind z 5te imene jeep dur d gegend gfahre. e hammerschöni landschaft het üs da erwartet. leider hets scho sit 2 mönat nüme richtig grägnet und darum isch alles sehr trocke gsi. au d wasserreservoir, wo suscht diversi tier sind, sind total vertröchnet gsi und darum hemer leider nur es paar Strüüs, Flamingo, Moorhuhn und d naselöcher vomene kaiman atroffe.

Mer hend au zwei Menonnite-kolonie bsuecht. faszinierend, wie die sich da organisiert hend mit allem drum und dra und da es sehr guts lebe läbet.

Concepcion

2010-08-22T23:33:00.007+02:00

De hütig tag hemer in concepcion verbracht. gemäss em oli isch das de arsch vo de welt...abr wenn de wüsst, vo mer morn here gönd, den würd ihms lache au vergha!!! ;)

dur ganz concepcion führt genau 1 richtigi strass, de reste sind alles sandstrasse. dementsprechend staubig isch au alles. mit emene böötli hemer de rio paraguay überquert und hend e insle uf em fluss aglueget.
da es leider kei strassecharte git und so ziemli jedi ussag vo dene guete paraguayaner unterschiidlich isch, hemer üs entschlosse, es tourli imene leiterwägeli z mache vo vomene ross zoge wird. das arme ross het üs zwar fast nöd mööge zieh....! nach ca. 30 minute het üs de hinter soooo weh due, das mer gotte froh gsi sind, vo mer üses hotel gseh hend!!!!

de rest vom herrliche nachmittag mit sunne und viiiiil wärmi hemer den no am pool vom hotel verbracht. jez gömer den no go fein go z nacht esse und morn am morge gats wiiter uf FILADELFIA.

Paraguay

2010-08-22T02:31:00.005+02:00

Gester, am Fritig, bini uf Paraguay ufbroche. Zerst 45 minütige flug uf buenos aires, den 4 stunde warte und den en 80minütige flug uf asuncion. d michi und de oli hend scho am flughafe uf mich gwartet..... :)

Asuncion isch d hauptsadt vo paraguay und dementsprechend gross. leider hets im ganze nöd so viel z büüte...glaubemer uf jedefall. werdet den am schluss nomal in asuncion sii und d stadt gnauer aluege!

Hüt am morge hemer üs uf de wiiterweg nach Concepcion gmacht. Gemäss lonely planet e fahrt zwüschet 4-6 stund, gemäss Billettverchäufer 7 stund und in tat und wahrheit schlussenlich 9 stund. es isch echt en horrortrip gsi. mir hend scho fast 1 stund bruucht, bis mer endlich us Asuncion dusse gsi sind. jedi 5 meter hett de bus wieder aghalte, es sind neuii lüüt dezuegstiige und s schlimmste sind ja die verchäufer gsi vo über unterhose bis zu esse und pille alles einem hend welle atreiie. und das sogar au, vo de bus scho pumpevolle gsi isch und d lüüt im gang gstande sind. dementsprechend gross isch au de "durchgangsverchehr" im bus gsi. weiss echt nöd, wie vie täsche und ärsch ich is gsicht kriagt han :(
de gröbst isch ja aber gsi, vos mitemene halbtote chind in bus ine cho sind!!!!!! das arme chind isch eifach am strasserand gläge samt familie und den hends das s zweite in bus inebugsiert...gstunke hend s zu allem elend au no!!!!

nach laaaaaaaaange laaaaaangwilige 9 stund simer den endlich in Concepcion acho. das isch e studentestadt vo absolut toti hose herrscht. s hauptfortbewegigsmittel isch es töffli....und uf es zweier töffli kriagt mer da locker vom hocker 5 persone druf. helm? das bruuchet nur weiiecher!! ;) autonummere?? für was??

morn hemer üs jez vorgno en easy tag z mache. bloss i kein bus inesitzte!! ;)

mis letzte Weekend in Montevideo

2010-08-16T00:19:00.004+02:00

Mis letzte Weekend in Uruguay hani in Montevideo verbracht. Am Samstig simer uf de "el cerro" gange. Das isch so zege de "höchsti" hüügel vo ganz Uruguay und das mit 132 Meter!!!! Uf em cerro het mer e wunderbari ussicht über Montevideo und de Rio de la plata.

Jez bini no genau 4 täg in Uruguay und den flüügi uf Paraguay. Am fritig triff i mi dete mit minere Schwöster und ihrem Früünd und den reisemer zeme dur Paraguy!! den fanget endlich au mini ferie a..... ;)

feria de tristan narvaja - grösster Strassenmarkt in Montevideo

2010-08-09T00:10:00.006+02:00

Jede Sunntig findet in Montevideo en riiisige Strassemarkt statt. Mer chan da eifach alles chaufe...würkli alles!! Gmües, Werkzüüg, Velo, Huustier, Chleider, Schmuck...eifach alles. Und das ohni irgend e ordnig oder so öbis...de Gmüessverchäufer verchauft also im gliche Stand no Unterhose und Stocke!! ;)

jede typische Uruguayaner trinkt Mate. das isch en Tee, wo extrem stark isch. Und de trägets die ganz ziit umenand inklusive Thermofläsche fürs heisse Wasser.

Punta del Este

2010-08-08T01:00:00.009+02:00

Am Fritig simer nach Punta del Este gfahre. Das isch DE badeort schlechthiin im Summer....nur doof, dass mir da jez Winter hend. Es isch absolut gar nüt los gsi, d Gschäfter und d Resti sind zue gsi und mir hend chöne froh sii, wenn üs uf de strass öbert begegnet isch!! Defür hemer super Wetter gha, natürlich nöd zum bädele, abr mir hend mal ohni Jacke dusse chöne si.

am Hafe une isch es defür zue und her gange. mer hend grad miterlebt, wie d fischerboot zrugg cho sind, wies de fang präsentiert und den seziert hend. nacher het mer de fisch grad chöne chaufe. d fisch-abfäll hend natürlich viili seehünd und möwe aglockt...e herrlichi atmosphäre gsi.

Am Namittag simer den uf d Isla de Lobbo usegfahre. Uf dere Insle lebet nur Seehünd und Touriste chönd nur rund umefahre, abr nöd uf d Insel. Wahnsiinig viili Seehünd hend gsüünnelet und badet.

Den simer no zum Casapueblo usegfahre. Das isch e Siedlig vo zemehängend baut worde isch und en heerliche usblick ufs meer het. de sunneuntergang isch eifach atemberaubend gsi.

Fun Fun

2010-08-08T00:23:00.003+02:00

Am Dunnstig simmer mit de Schuel is Fun Fun gange. I dere Bar lauft immer am Dunnstig Live Tangomusik. Isch en super Abig gsi mit feinem Esse, guter Musik und UVITAS. das isch en schnaps mit Truube...extrem fein, abr uuu süess!! :)

auf der Suche nach Diego Forlan......

2010-08-04T22:39:00.004+02:00

heute war ich mit der Schule im Fussballstadion von Montevideo. In diesem Stadium wurde die erste Fussballweltmeisterschaft ausgetragen und Uruguay hat gewonnen.

ich könnte auch ein gaucho werden......

2010-08-02T01:14:00.006+02:00

Mis erste "fin de semana" hani gnützt und bin es biz uruguay go erkunde. Am fritig hets e sooo gregnet, dass de tag sprichwörtlich is wasser gfalle isch. han echt no nie erlebt, dass es en ganze tag chan dunnere, blitze und sooo regne. Guten Mutes simmer uf Colonia Valdense gfahre. Das Dörfli liit i de Schwiizer Kolonie vo Uruguay und mer glaubs chum, s typische Ässe dete isch: FONDUE ! :) Au d Nachnäme vo de lüüt sind total schwiizerisch/düütsch wie zum Biispiel: Schmid, von Rotz, Hofer etc. Es git sogar e städli vo Nueva helvetica heisst. Leider hets e soo gregnet vo ich acho bin, dassi gar kei lust gha han, zum das städli z erkunde.

Mir hend imene hostel gschlafe, vo total abgläge gsi isch. mer hend sicher 1 kilometer bis zum nächste Nachbar gha.

Zum Glück sich am Samstig super wetter gsi (also chalt, abr sunnig) und mir sind e chli go wandere. E super schöni landschaft. suscht het mer leider überhaupt nüt anders chöne mache und so hani es biz am "ober-gaucho" gulfe. en gaucho isch (für die wos nöd wüsset) e art argentinische/ uruguayanische cowboy! naütlrich gits jez kei richtige gauchos meh, abr es möchtet all e chli uf die art lebe!
uf de farm hets 3 Rösser, 6 Rinder und 2 Schaf gha. Zerst hani müesse go d Rösser iifange, den simer go usritte gange, den hani müesse d Chälber iitriibe und füettere! lediglich as schaf het er mich nöd lah, s einte erwartet Baby's und das het er nöd in ufregig welle versetzte! de termin wär genau a dem wucheend gsi, abr leider sind nöd cho, bis wo mer gange sind!
Es het sogar e primarschuel in Colonia Valdense und jetzt ratet e mal, wie d chinde id schuel chömet?? - Ja genau, uf em Pferd! 15 Chinde und all chömet mit em Pferd i d schuel. d Wiise rund um d Schuel isch fast grösser als s schuelgebäude selber!

Am Sunntig simer den nach Colonia del Sacramento wiitergfahre. e herzigi stadt am rio de la plata (Meer zwüschet Argentinie und Uruguay vo eigentlich en Fluss sött sii). Es isch bitterchalt gsi, abr mir sind tapfer umemarschiert und hend üs das städli aglueget!

El pony pisador :)

2010-08-02T01:05:00.003+02:00

Mis zweite dihei in Montevideo isch wohl oder übel s "pony pisador" worde. das heisst so viel wie: das stampfende pferd!!
isch e super bar und es gat immer total post ab! :)

Montevideo

2010-07-28T23:41:00.007+02:00

Am Zistig hani chöne is zimmer wechsle....jez hani es fenster, en balkon und en schminktisch im zimmer!! :) nur dummerwiis sind d fänster soo undicht, dassi amigs s gfühl han, de lastwage uf de strass fahrt direkt dur mis zimmer!

Am Zistig hani mit de Klass e tour du Montevideo gmacht. mer sind e chli i de altstadt ume gloffe und den no in mercado del puerto. das isch en markt, wo mer alles chaufe chan. das ganze isch aber nöd verusse, sondern inere riiisige halle drine und mer chan au direkt dete esse. s getränk vom markt isch en "medio y medio" das isch zur hälfti wii und den no champagner. ich sege oi...muy rico! hend super fein gässe und trunke dete!

hüt simer wieder e chli d stadt go aluege. unter em plaza independica hets e riisigi halle und zwei lebige "soldate" bewachet irgend en pokal. was genau das isch, hemer nöd usegfunde, abr uf jedefall hemers nöd gschafft, dass sich die zwei soldate mal beweget. isch üs e chli british vor cho... ;)

jez bini wieder uf em sprung is nachtlebe! morn sötti definitiv mal e chli lerne.....! :)

de Start isch glunge!

2010-07-26T23:24:00.010+02:00

Am Samstig morge früh het mini Reis agfange. Zerst bini uf Frankfurt gfloge und vo dete wiiters uf Buenos Aires. Leider hets dermasse Wind gha, dass mer schlussendlich mit enere Verspötig vo ca. 1 1/2 Stund endlich hend chöne abflüge.

Die erst Lektion vo ni den grad han müesse lerne in Buenos Aires: "Selbst wenn de Flug 2 Stund verspötig het, heisst das no lang nöd, dass de Abholer pünktlich isch". Guet alles tranquillo und locker neh....! Schlussendlich isch den de Abholer gar nöd erschiine, defür het er mir en taxi is hotel organisiert.

Am nächste Tag (Sunntig) isch mini Reis wiitergange....mit de Fähre uf Colonia (Uruguay) und den wiiters mit em Bus uf Montevideo. In Montevideo acho, hani mir en taxi gschnappt und bin wiiters zu de Schuel gange.

Isch super, mis Zimmer isch sogar uf em gliche Stockwert wie d schuel. :) suscht hani ehner en bunker mitemene Bett drinne. Abr so wie ich verstande han, chani am Zistig zimmer wechsle. Mini "Mitbewohner" sind 2 Brasilianerinne, 1 Brasilianer und 1 Östricherin. Die eint brasilianerin gat hüt nacht und den kriag ich ihres zimmer.

Suscht hemer no e chlini chuchi, es WC, e 100 Jahr alti duschi und e stube. Isch eigentlich im grosse und ganze sehr friedlich.

Leider spielts wetter überhaupt nöd mit. Es isch soooooooo chalt da.....und natürlich isch heize da ehner es fremdwort. De seich am ganze isch, dass d zimmer und d stube zeme sind und für d chuchi, s wc oder d duschi muesch über en chline vorhof laufe. Super sach, wenn i de nacht uf de topf muesch!! ;)

de erst Schueltag hani au überstande. Im ganze simer momentan nur grad 10 Persone. i minere klass bini aber nur grad z 3te...d östricherin und e Irin. Super, die verstaht mer den gar nöd wenn sie redet....!

vo de Stadt montevideo hani nonig viel gseh, aber da machi morn mit de schuel e stadttour!

jez mueni mi langsam parat mache....mer gönd mit de "WG" go z nacht esse und je nachdem no wiiters.....! isch echt happig, das brasilianer-päärli redet konsequent nur spanisch! abr für das bini ja glaubs au da ;)

scho bald, bald isch es so wiiit....

2010-05-27T15:17:00.002+02:00

Am 24. JULI sägi wieder e mal "adios amigos" und verreise nomal uf südamerika! de erst monat wirdi in montevideo, de hauptstadt vo uruguay verbringe. den gats wiiter uf paraquay und argentinie....

ich hoffe, ich han ab und zue ziit es paar erlebnis und föteli z poste :)